Mwen fèt nan lakou peyi d Ayiti. Yon ti kote ki byen difisil pou w konprann, mwen pa kwè gen de konsa. Pafwa mwen wè peyi m tankou yon bèl kreyòl ki konnen valè l e l ap fè gason mache; lè ou kwè ou bon, ou wè ou pa nan won. Maton yo di Ayiti se tè glise. Men gonmbo glise sa a, lè moun vini goute l yo pa mande ale.

Mwen ta renmen jwenn bèl fraz moun save pou m pale de peyi m. Men, mwen pa maton nan pwezi ak di pawòl swa. Se pou tèt sa, mwen fè yon bouke ak de twa bèl pòtre, bèl imaj, sou entènèt la pou m pataje ak nou.

Si yon jou, ou rive nan sitiyasyon pou rekòmande sit sa bay yon moun paske ou an pann mo pou eksplike reyalite peyi Dayiti se va deja yon gwo rekonpans pou nou menm ki travay sou li a. Lè sa a na va santi travay nou sèvi kichòy.

Nan tan lontan, zile sa a se te boul lò lèzanti. Menm si l pran kèk move pataswèl nan men aganman tout plim tout plimay, lanati ak moun k ap viv ladan l toujou rete bèl. Nou ta menm di, entak. Pou konprann sa a, ou blije fèmen je w pou admire l ak je ki nan kè w. Ou kwè se bèl pye bwa, ak bèl jaden, ki nan chak bouk, chak bitasyon... Li enpòtan pou nou pwoteje yo, pou richès nou pwal wè la yo kapab donnen epi kòmanse rapòte kichòy pou peyi sa a. Kilti peyi sa, fason nou viv, bon jan akèy pèp Ayisyen renmen bay moun vini, se tou sa mezanmi ki se avantaj bab ak moustach pou nou chita yon bon jan plan ki pou rale mennen touris pa bò isit.

Sa m sot di la yo soti nan tout zantray mwen. Nan sans sa a, se ak kè kontan mwen envite nou founi je n gade albòm foto m. Sa nou pral wè la a, se yon ti lòsyè nan sa lanati Ayiti sere pou nou, sou kote pou touris al banbile ak sou fason moun viv sou zile sa a. Pi rèd toujou, nan sit sa a, m ap ban nou kèk ti konsèy sou ki jan nou sipoze pran chimen pou n al fè touris. M ap fè n goute tou kèk bon plat manje koupe dwèt epi ede n dekouvri bèl ti kado souvni pou n antre lakay nou.

Layite kò n, sikre je n...

Ti pawòl dous otè a