Si ou rive la sè ke ou visite sit lan jouk nan bout. Osinon ou vle fè yon ti jouda sou ki moun ki fè kalite travay sa . Kenpòt, mwen espere ke ou te aprann yon ti kichoy sou peyi a. Mwen swete nan fon kè m sa te fè w plezi...

Koulye a li lè li tan pou nou fè konesans reyèlman vre. Ou wè sa m fè, ou gentan konnen twa ka nan mwen. Ti rès ki rete a wap jwenn li nan ti tablo a kote a.

Men se pa sa ki pi enpòtan. Menm jan se pa yon sèl dwèt ki manje gonmbo, se menm jan an pou mwen te ka reyalize yon katafal travay konsa, te genyen anpil moun enpòtan ki te gratis ti cheri, ban mwen konsèy, koudmen ak ankourajman. Se pou yo mwen fè dènye paj sa yo. Wout la te long. Chimen an te gen anpil vire tounen, anpil devire, si yo pat la pou di mwen : " Vanse Vanse ! W ap rive kan menm", mezanmi, gen lontan m ta dekouraje wi !
Se pou tèt sa mwen genyen de ti seksyon ankò. Chapo bà pou moun ki te banm koudmen, avèk "Ban Dèyè djaz la" pou tout sa ki pa janm derefise ban mwen, oubyen bay sa mwen fè, bourad.

Se sa ki enpòtan pou mwen. Si jodi a mwen bout nan travay la, si jodi a pwojè a vinn reyalite mwen dwe voye anpil lizaj pou tout fanatik sa yo...

Anfin mwen pa ta ka ale san mwen pa mande sila ki anlè ya e ki gen tout pouvwa, benediksyon pou ou menm ki ap li m kounye a.

O revwa.
Ti zarenyen an